Ramdas Athawale News: केंद्रीय राज्यमंत्री रामदास आठवले यांनी वंचित बहुजन आघाडीचे प्रमुख प्रकाश आंबेडकर यांना एकत्र येण्याचं आवाहन केलं आहे. बाबासाहेब आंबेडकरांचे स्वप्न पूर्ण करण्यासाठी आणि आंबेडकरी एकतेसाठी एकत्र येण्याची गरज त्यांनी बोलून दाखवली आहे.
रामदास आठवले यांनी आपल्या ‘एक्स’ हँडलवर प्रकाश आंबेडकर यांचा फोटो पोस्ट करत डॉ. बाबासाहेब आंबेडकर यांचं स्वप्न पूर्ण करण्यासाठी आणि आंबेडकरी एकतेसाठी आपण एकत्र यायला हवं, अशा भावना व्यक्त केल्या आहेत. आठवले यांनी पुढाकार घेत प्रकाश आंबेडकर यांच्याकडे राजकीय युतीसाठी हात पुढे केल्याने या आवाहनाला प्रकाश आंबेडकर सकारात्मक प्रतिसाद देणार का, हे पाहणं महत्त्वाचं ठरणार आहे.
आठवले नेमकं काय म्हणाले?
रामदास आठवले यांनी प्रकाश आंबेडकरांना सोबत येण्याचं आवाहन करताना लिहिलेल्या एक्स पोस्टमध्ये म्हटलं आहे की, “एक कदम महाबोधि महाविहार के लिए, एक कदम आंबेडकरी एकता के लिए, एक कदम बाबासाहेब के सपने के लिए…महाबोधी की मुक्ति की है पुकार, आंबेडकरी एकता हो अब आधार, टूटे रिश्तों को जोड़ने चला, बाबासाहेब का सपना फिर से खिला,” असं म्हणत आठवले यांनी आंबेडकरी एकतेची गरज अधोरेखित केली आहे.
दरम्यान, यापूर्वीही रामदास आठवले यांनी आंबेडकरी एकतेची गरज बोलून दाखवली होती. मात्र तेव्हा प्रकाश आंबेडकर यांनी खरपूस शब्दांत त्यांचा समाचार घेतला होता. त्यामुळे आता पुन्हा एकदा आठवले यांनी मैत्रीचा हात पुढे केल्यानंतर प्रकाश आंबेडकर यांच्या भूमिकेत बदल होऊन ते सकारात्मकता दर्शवतात का, हे पाहावं लागेल.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा