गेल्या काही दिवसांपासून आमदार शिवाजी पाटील यांच्याबाबत विविध चर्चांना उधाण आलं आहे. शिवाजी पाटील यांनी आज या प्रकरणावर उलगडा केला आहे. संबंधित प्रकरण हनीट्रॅपचं नसून आपण या प्रकरणात तक्रार केली असल्याचं स्पष्ट केलं.
आमदार शिवाजी पाटील यांनी याबाबत माध्यमांशी बोलताना सांगितले की, “जवळपास महिन्याभर त्यांना वेगवेगळ्या मोबाईल नंबरवरून एका महिलेने वारंवार अश्लील मेसेज, फोटो आणि व्हिडिओ पाठवले होते. या मेसेजमध्ये पैशांची मागणी केली जात होती. सुरुवातीला मी दुर्लक्ष करून नंबर ब्लॉक केला. मात्र सतत नवीन नंबरवरून मेसेज येत राहिल्याने अखेर मी पोलिसात तक्रार दाखल केली आहे” असे त्यांनी स्पष्ट केले.
आमदार पाटील यांनी केली पोलिसांत तक्रार
या संदर्भात आमदार पाटील यांनी चितळसर पोलीस ठाण्यात अधिकृत तक्रार दिली आहे. पोलिसांनी त्यांचा मोबाईल आणि इतर डिजीटल पुरावे ताब्यात घेतले असून तपास सुरू केला आहे. “मी त्या व्यक्तीचा अकाऊंट नंबरही पोलिसांना दिला आहे. तपासातून कोणताही राजकीय हेतू असेल तर तो उघड होईल,” असे पाटील यांनी सांगितले.
“हनी ट्रॅप नाही, राजकीय हेतू असण्याची शक्यता”
आमदार शिवाजी पाटील यांनी हनी ट्रॅपचा आरोप फेटाळून लावत, हा प्रकार कोणत्या राजकीय हेतूनं रचला गेला असावा, असा अंदाज व्यक्त केला. ते म्हणाले, “निवडणुका जवळ आल्या आहेत. राजकारणात असताना असे वारंवार प्रकार कोणी तरी करत असतात. मात्र मी घाबरणार नाही. तक्रार केली आहे, आणि पोलिस तपास करतील. दोषींवर कारवाई होईलच.”
सणांमुळे उशीर, आता तपास होणार वेगात
आमदार पाटील यांनी पुढे सांगितले की, “गणपती आणि नवरात्र काळात मला वेळ नव्हता, त्यामुळे याबाबत तक्रार दाखल करण्यात उशीर झाला. पण सतत त्रास होत राहिल्याने अखेर मी पोलिसांत धाव घेतली आहे. आता तपास सुरू असून, सर्व पुरावे पोलिस शोधत आहेत.”
आमदार पाटील यांच्या या प्रतिक्रियेनंतर प्रकरणाची वास्तविकता स्पष्ट झाली आहे. त्यांनी पुढाकार घेऊन अधिकृत पातळीवर तक्रार दाखल केल्याचे समोर आल्याने, आता लवकरच चर्चेत असणाऱ्या या प्रकरणातील राजकीय आणि वैयक्तिक दोन्ही स्तरांवरील प्रश्नांना आळा बसण्याची शक्यता आहे.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा