सुप्रिया सुळे म्हणाल्या, “शेतकरी, लाडक्या बहिणींच्या अर्जामध्ये थोडीशी चूक झाली, तरी ते त्वरित बंद केले जातात. परंतु, गुन्हेगारी प्रवृत्तीच्या लोकांना मात्र लगेच पासपोर्ट मिळतो आणि परदेशात जाण्याची मुभा दिली जाते. हा कोणता न्याय आहे,” असा सवाल त्यांनी केला. त्यांनी पुढे सांगितले, “अमली पदार्थांशी संबंधित गुन्हे दाखल असलेल्या नीलेश घायवळ याला पासपोर्ट मिळून तो देशाबाहेर पसार होण्यामागे अदृश्य शक्तीचा हात आहे.”
Pune Crime : कुख्यात गुंड निल्या घायवळ की गायवळ? आधारकार्डवर काय नाव, पासपोर्टवर त्याने… मोठी माहिती समोर
सुळे यांनी या प्रकरणाची गंभीर दखल घेतली. त्या म्हणाल्या, “कुख्यात आरोपी नीलेश घायवळ याला जलदगतीने पासपोर्ट दिला जातो. त्यातही गुन्हे दाखल असूनही पोलिसांकडून त्याला क्लीन चिट दिली जाते. हा प्रकार अतिशय गंभीर आहे.” त्या पुढे म्हणाल्या, “आरोपी थेट विदेशात पळून गेल्याचे प्रकरण गंभीर असून, घायवळला पळून जाण्यास कोणी मदत केली याची चौकशी व्हायला पाहिजे. ती झाली नाही, तर संसदेत हा विषय उपस्थित केला जाईल.” हा गंभीर प्रकार देशाच्या गृहमंत्र्यांच्या निदर्शनास आणून देणार असल्याचेही त्यांनी सांगितले. मुख्यमंत्री देवेंद्र फडणवीस आणि गृहमंत्री अमित शहा अमली पदार्थांवर ‘शून्य सहिष्णू’ धोरण असल्याचे नेहमी सांगतात. त्यामुळे या प्रकरणाची सखोल चौकशी करून दोषींना कठोर शिक्षा व्हावी, अशी अपेक्षा सुळे यांनी व्यक्त केली.