पुण्यात काही दिवसांपूर्वी गँगस्टर निलेश घायवळ याच्या टोळीतील आरोपींनी गाडी ओव्हर टेक करायला रस्ता दिला नाही या क्षुल्लक कारणावर एकावर गोळी झाडली. त्यानंतर लगेच थोडं पुढे जाऊन एकावर कोयत्याने वार केले. एवढा भयानक विषय पुण्यात झालाय. पुण्यात गणेश विसर्जनाच्या पूर्वसंध्येला टोळी युद्धाचा भडका उडालेलाच होता. त्यानंतर घायवळ गँगच्या आरोपींनी सर्वसामान्यांवर हल्ला केल्याने पुण्यातील सुरक्षा आणि कायदा व्यवस्था किती चिंताजनक अवस्थेत आहेत, याची प्रचिती येते.

पोलिसांनी गुंड निलेश घायवळ याच्या टोळीतील आरोपींना बेड्या ठोकल्या आहेत. सर्वसामान्य नागरिकांवर हल्ला करणाऱ्या आरोपींना अटक केली आहे. तसेच पोलिसांनी आता घायवळ टोळीवर मोक्का अंतर्गत कारवाई देखील केली आहे. पण मोक्का लावला तरी त्यांचा म्होरक्या पोलिसांना गुंगारा देवून विदेशात फरार झाला आहे त्याचं काय?

विशेष म्हणजे पोलीस, पासपोर्ट कार्यालय यांनाही या निलेश घायवळने पद्धतशीरपणे कळू न देता पासपोर्ट बनवला. त्याने त्यासाठी आपल्या नावाची स्पेलिंग बदलली, तसेच त्याने अहिल्यानगरचा चुकीचा पत्ता दिला. त्याने पत्ता असा दिला जो पत्ताच नाही. पोलीसही तिथे व्हेरिफिकेशनला जावून आले. पण पोलिसांनी पासपोर्ट कार्यालयाला रिपोर्ट काय दिला? Not Available फक्त एवढी माहिती पोलिसांनी पासपोर्ट कार्यालयाने दिली. पासपोर्ट कार्यालयाने देखील याच माहितीच्या आधारावर पासपोर्ट देवूनही टाकला.

विशेष म्हणजे सर्वसामान्य नागरिकांना फेऱ्यांवर फेऱ्या मारायला लावणाऱ्या पासपोर्ट कार्यालयाने निलेश घायवळला पोलिसांच्या व्हेरिफिकेशनमध्ये Not Available या शेऱ्यावरही पासपोर्ट बहाल करुन टाकला. त्यामुळे अहिल्यानगच्या कोतवाली पोलीस ठाण्याचे पोलीस आणि पासपोर्ट कार्यालय यांच्या कार्यपद्धतीवर संभ्रम उपस्थित होत आहे. एवढा मोठा गुन्हेगार आपल्या नावाची स्पेलिंग बदलत सहज पासपोर्ट मिळवतो. विशेष म्हणजे यंत्रणांची एवढीच चूक नाही. तर आणखी बऱ्याच गोष्टी आहेत.

निलेश घायवळ याने 23 डिसेंबर 2019 ला प्रादेशिक पासपोर्ट कार्यालयाकडे तात्काळ पासपोर्टसाठी अर्ज केला होता. त्यासाठी त्याने आपल्या नावाच्या स्पेलिंगमध्ये बदल केला होता. त्याने Ghaywal या नावातील H काढून Gaywal म्हणजेच गायवळ असं केलं होतं. तसेच त्याने अहिल्यानगरच्या कोतवाली पोलीस ठाणे हद्दीतील गौरी घुमटानंदी बाजार, कोतवाली, माळीवाडा रोड 414001 असा पत्ता आपल्या अर्जावर टाकला होता.

पासपोर्ट कार्यालयाने निलेश घायवळचा अर्ज तपासणीसाठी कोतवाली पोलिसांकडे पाठवला. पोलिसांनी घायवळने दिलेल्या पत्त्यावर जावून पाहणी केली. पण त्यांना तिथे घायवळ राहत नसल्याचं लक्षात आलं. तसेच त्याच्यासोबत पोलिसांचा घायवळ सोबत संपर्क देखील झाला नाही. तरीही पोलिसांनी पासपोर्ट कार्यालयाला Not Available एवढाच अभिप्राय दिला. त्यानंतर पासपोर्ट कार्यालयाने देखील पासपोर्टसाठीचे इतर निकष वापरुन 16 जानेवारी 2020 ला त्याचा पासपोर्ट मंजूर केला.

या सगळ्या घटनांनंतर पोलिसांनी एका दरोड्याच्या प्रकरणात या निलेश घायवळला बेड्या ठोकल्या. त्याला 2021 मध्ये बेड्या ठोकण्यात आल्या आणि त्याच्यावर मकोका अंतर्गत कारवाई झाली. यानंतर घायवळला 2022 मध्ये जामीन मिळाला. पण कोर्टाने त्याचा पासपोर्ट पोलिसांकडे जमा करण्याचे आदेश दिले. पण कोर्टाच्या आदेशानुसार चालणारा घायवळ कुठला? त्याने पासपोर्ट जमा केलाच नाही आणि पोलिसांनाही त्याचा पासपोर्ट जमा करुन घ्यावासा वाटला नाही? असं आश्चर्य व्यक्त होत आहे. अखेर यामुळे घायवळचा चांगला फायदा झाला. घायवळ पासपोर्टच्या आधारावर या महिन्यात 3 महिन्यांचा व्हिजा घेऊन युरोप टुरला निघून गेला. तो आता स्वित्झर्लंडमध्ये एन्जॉय करतोय आणि पोलिसांपुढे त्याची वाट पाहण्याशिवाय दुसरा कोणताच पर्याय नाही.