दुचाकीला ट्रकची धडक

महेश पांडुरंग शेंबडे (वय ३२, रा. पैठण) असं मृत्यू झालेल्या तरुणाचं नाव आहे. तर अनिल कानाडे रा. सोलापूर, ह. मु. पैठण असं गंभीर जखमी तरुणाचं नाव आहे. दरम्यान या प्रकरणी अधिक माहिती अशी की, महेश शेंबडे, अनिल कानाडे हे दोघेही एका खाजगी फायनान्स कंपनीत काम करत होते. फायनान्स कंपनीचे थकलेले पैसे वसूल करण्याचं त्यांचं काम होतं. यामुळे कंपनीने ठरवून दिलेल्या जिल्ह्यातील काही भागांमध्ये जाऊन ते वसुली करत होते. शनिवारी दोघे फायनान्स कंपनीच्या वसुलीसाठी गेले होते. पैठण तालुक्यातील पिंपळवाडी पिराची परिसरातून एम एच २० इपी ४०२७ दुचाकीने परत येत होते.
मुंबई-गोवा महामार्गावर मोठी दुर्घटना, गणेश भक्तांच्या लक्झरी बसला भीषण आग; वाहन जळून खाक
यावेळी कातपूर फाट्याजवळ पाठीमागून भरधाव आलेल्या एम एच ५६.६२८७ या ट्रकने त्यांच्या दुचाकीला पाठीमागून जोरदार धडक दिली. अपघात इतका भीषण होता की महेश ट्रकखाली चिरडला गेल्याने त्याचा जागीच मृत्यू झाला. तर अनिल हे गंभीर जखमी झाले. याप्रकरणी ट्रक चालकाला पोलिसांनी ताब्यात घेतलं असून, अपघातग्रस्त वाहनं पोलीस ठाण्यात देण्यात आली आहेत.
वडिलांचा इशारा, आईने हातात चाकू दिला; चार मुलांचा शेजारी कुटुंबावर हल्ला, जमिनीच्या वादातून संभाजीनगरमध्ये खळबळ

महेशच्या कुटुंबावर दुःखाचा डोंगर

या अपघातात महेशचा जागीच मृत्यू झाला, तर अनिल जखमी आहे. या घटनेमुळे महेशच्या कुटुंबावर दुःखाचा डोंगर कोसळला आहे. घटनेची माहिती मिळताच घाटी रुग्णालयामध्ये त्याच्या नातेवाईकांनी धाव घेतली. घटनेनंतर कुटुंबीयांनी टाहो फोडला होता.

दरम्यान या प्रकरणी पुढील तपास पोलीस करत आहेत. दरम्यान, गेल्या काही दिवसांपासून सातत्याने होत असलेल्या अपघात चिंतेचा विषय ठरत आहे. अनेक अपघातांमध्ये दुचाकी स्वार हे हेल्मेट वापरत नसल्याचं दिसून येत आहे. यामुळे प्रशासनाच्या वतीने सातत्याने हेल्मेट वापरण्याच आवाहन करण्यात येत आहे.