मिळालेल्या माहितीनुसार, ही घटना मंगळवारची असून तीनही अल्पवयीन विद्यार्थी बुलेटवर जात होते. विशेष म्हणजे, एक विद्यार्थी मोटारसायकलच्या पुढच्या बाजूला अत्यंत धोकादायक पद्धतीने बसून प्रवास करत होता. हा प्रकार पाहून रस्त्यावरून जाणाऱ्या नागरिकांनी तातडीने व्हिडिओ शूट केला. काही तासांतच हा व्हिडिओ सोशल मीडियावर पसरला.

महिलेचे लपून अश्लील व्हिडिओ काढले, खडसेंच्या जावयाचं नवं कांड? पुण्यात गुन्हा दाखल

व्हिडिओ व्हायरल झाल्यानंतर नागपुरातील वाहतूक पोलिसांनी तातडीने तपास सुरू केला. बुलेटच्या नंबरच्या आधारे तिन्ही विद्यार्थ्यांचा शोध घेण्यात आला आणि त्यांना ताब्यात घेण्यात आले. चौकशीत हे सर्वजण अल्पवयीन असल्याचे स्पष्ट झाले. वाहतूक विभागाने या गंभीर उल्लंघनावर कठोर कारवाई करत गाडीवर ७,५०० रुपयांचा दंड ठोठावला. याशिवाय, याआधीच्या नियमभंगासाठी लावण्यात आलेल्या १,००० रुपयांच्या दंडासह एकूण सुमारे ८,५०० रुपयांचा दंड वसूल करण्यात आला.

याबाबत विद्यार्थ्यांच्या पालकांनाही वाहतूक विभागाच्या कार्यालयात बोलावून त्यांच्या समोर घटनेची माहिती देण्यात आली. तसेच, भविष्यात अशा घटना घडू नयेत यासाठी कडक चेतावणी पोलिसांकडून देण्यात आली. त्यानंतर विद्यार्थ्यांना त्यांच्या पालकांच्या ताब्यात देण्यात आले.

दरम्यान, वाहतूक पोलिसांनी नागरिकांना आवाहन केलं आहे की, रस्त्यावर अशा प्रकारची स्टंटबाजी केवळ वाहतूक नियमांचे उल्लंघन नाही, तर जीवितास गंभीर धोका निर्माण करणारी आहे. यामुळे अपघाताची शक्यता वाढते आणि इतरांच्या जीवावर बेतू शकते. अशा घटनांवर शून्य सहनशीलतेची भूमिका घेतली जाईल, असे पोलिसांनी स्पष्ट केले आहे.