रोहित पवार उर्फ बारक्या हा गुन्हेगारी पार्श्वभूमीचा होता. 2020 सालापासून त्याच्यावर खूनी हल्ला, मारामारी व खंडणीचे तीन गुन्हे दाखल होते. रेकॉर्डवर असतानाही तो वर्षभर फरार होता. दोन महिन्यांपूर्वी इस्लामपुरात खून झालेल्या गुंड नितीन पालकरचा रोहित हा साथीदार होता. गुन्हेगारी प्रवृत्तीचा असल्याने त्याचा वावर नेहमी गुन्हेगारी वर्तुळात असायचा. त्याच्यावर हल्ला करणारा हौसेराव आंबे व दोन अल्पवयीन मारेकरी त्याचे साथीदारच होते.

दोन दिवसांपूर्वी एकाच्या घरात जाऊन रोहितने दमदाटी केल्याचा प्रकार घडला होता. या प्रकारानंतर तिघा मित्रांनी मिळून त्याच्यावर पाळत ठेवली. दुपारी साखराळे येथे अभियांत्रिकी महाविद्यालयाच्या गेटसमोर आल्याची माहिती मिळताच तिघे दुचाकीवरून आले.

आपल्यावर हल्ला होईल, या भीतीने रोहित रस्त्याच्या कडेने बचाव करण्यासाठी पळत सुटला. तेव्हा त्याचा पाठलाग करत तिघांनी हल्ला केला. यात रोहितच्या डोक्यात धारदार पारळीचा घाव बसला. तर रोहितने आपल्याजवळ असणार्‍या चाकूने प्रतिकार करण्याचा प्रयत्न केला. पण तिघांनी त्याच्यावर त्याच चाकूने व पारळीने हल्ला चढवला. रक्ताच्या थारोळ्यात डोक्यात पारळी रुतून बसलेल्या अवस्थेत रोहित निपचित पडल्यावर तिघे पळून गेले.

तत्पूर्वी जखमी अवस्थेत रक्ताच्या थारोळ्यात पडलेल्या रोहितला त्याच्या मित्रांनी दुचाकीवरून उपचारासाठी उपजिल्हा रुग्णालयात हलवले मात्र उपचार सुरू होते. डोक्यात धारदार पारळीने घाव घातल्याने अतिरक्तस्रावाने त्याचा मृत्यू झाला. भरदिवसा रस्त्याकडेला हा प्रकार झाल्याने घटनास्थळी गर्दी झाली. घटनास्थळावरून मारेकर्‍यांनी थेट पोलीस ठाण्यात धाव घेतली. या प्रकारानंतर इस्लामपूर शहरात खळबळ माजली आहे.