ही घटना बुधवारी मध्यरात्री ३ वाजताच्या सुमारास घडली. तीन चोरटे एकाच दुचाकीवर बसून प्रजापती नगरमधील एका निर्माणाधीन इमारतीत चोरी करण्याच्या उद्देशाने आले. तेव्हा या साईटवर ड्युटीवर असलेले सुरक्षा रक्षक लक्ष्मण रामदास मूले (वय अंदाजे ४५) यांनी चोरट्यांना थांबवण्याचा प्रयत्न केला. मात्र, चोरट्यांनी विरोध होताच लक्ष्मण मूले यांच्यावर चाकूने सपासप वार केले.
Pune Crime : अरे मी सोनम… पुण्यात 28 वर्षीय तरुणाला व्हिडिओ कॉल, अश्लील चाळ्यांचे स्क्रीनशॉट मारले, अडीच लाख उकळले
या प्राणघातक हल्ल्यात लक्ष्मण मूले यांचा जागीत मृत्यू झाला आहे. चोरट्यांनी हत्या करून घटनास्थळावरून पळ काढला. या घटनेमुळे परिसरात एकच खळबळ उडाली आहे. घटनेची माहिती मिळताच वाठोडा पोलीस घटनास्थळी दाखल झाले आणि तपास सुरु केला.

प्राथमिक तपासात धक्कादायक बाब समोर आली की, याच तिन्ही आरोपींनी काही वेळ आधी प्रजापती नगरजवळील डंपिंग यार्डजवळ एका पिझ्झा डिलिव्हरी बॉयला चाकू दाखवून लुटले होते. त्यांनी त्याच्याकडून मोबाईल फोन आणि रोख रक्कम जबरदस्तीने घेतली. पोलिसांनी तत्काळ तपास करून आरोपी कुणाल वानखेडे, घनश्याम बंजारी आणि एका अल्पवयीन मुलाला अटक केली आहे. मिळालेल्या माहितीनुसार, हे तिन्ही आरोपी आधीपासूनच गुन्हेगारी पार्श्वभूमीचे असून त्यांच्याविरुद्ध चोरी व लुटीच्या गुन्ह्यांची नोंद आहे.

दरम्यान, मृतक गार्ड लक्ष्मण मूले यांच्या मृतदेहाला उत्तरीय तपासणीसाठी शासकीय वैद्यकीय रुग्णालयात पाठवण्यात आले आहे. पोलिसांनी या दुहेरी गुन्ह्याची सखोल चौकशी सुरू केली आहे. नागपूर शहरात रात्रीच्या वेळेस वाढणाऱ्या गुन्ह्यांच्या घटनांमुळे नागरिकांमध्ये भीतीचे वातावरण पसरले आहे.