पुणे: पुणे जिल्हा काँग्रेस कमिटीचे अध्यक्ष आणि पुरंदर-हवेली विधानसभा मतदारसंघाचे माजी आमदार संजय चंदुकाका जगताप यांनी शनिवारी आपल्या पदाचा तसेच भारतीय राष्ट्रीय काँग्रेस पक्षाच्या प्राथमिक सदस्यत्वाचा राजीनामा दिला आहे. आज सासवडमध्ये कार्यकर्त्यांचा मेळावा घेत जगताप यांनी भाजपमध्ये प्रवेश करण्याचा निश्चय केला. दोन दिवसांत भाजपचे प्रदेशाध्यक्ष रवींद्र चव्हाण यांच्या उपस्थितीत संजय जगताप भाजपमध्ये प्रवेश करतील.

लोकसभा निवडणुकीत महाविकास आघाडीच्या उमेदवाराचा प्रचार केला. पण विधानसभेला मात्र महाविकास आघाडीतील पक्षांकडून म्हणावी तशी मदत आणि सहकार्य मिळाले नाही, अशी जगताप यांची भावना होती. त्यामुळे जगताप गेल्या काही दिवसांपासून नाराज होते. भोरचे आमदार संग्राम थोपटे यांनी काँग्रेसला रामराम ठोकून भाजपमध्ये प्रवेश केल्यानंतर संजय जगताप देखील भाजपमध्ये प्रवेश करणार असल्याचे चर्चा सुरू झाल्या होत्या. दरम्यान शनिवारी जगताप यांनी राजीनामा दिला आहे. वैयक्तिक कारणास्तव हा निर्णय घेतल्याचे त्यांनी नमूद केले आहे.

जगताप यांनी आपला राजीनामा महाराष्ट्र प्रदेश काँग्रेस कमिटीचे प्रांताध्यक्ष हर्षवर्धन सपकाळ यांच्या कार्यालयाकडे ई-मेलद्वारे पाठवला आहे. पुणे जिल्हा काँग्रेस कमिटीचे कार्याध्यक्ष संग्राम मोहोळ यांच्याकडेही राजीनामा पत्र सुपूर्द केले आहे. संजय जगताप यांच्या या निर्णयामुळे पुणे जिल्ह्यात काँग्रेसला आणखी एक धक्का बसला आहे. तर भाजपमध्ये आणखी एका माजी आमदाराचा प्रवेश होणार आहे.

संजय जगताप यांनी २०१९ ते २०२४ या कालावधीत विधानसभेत पुरंदरचं प्रतिनिधीत्व केलं. २००९ ते २०१९ अशी १० वर्षे आमदारकी भूषवलेल्या विजय शिवतारेंना पराभूत करुन जगताप आमदार झाले. त्यांनी ३१ हजारांच्या मताधिक्क्यानं निवडणूक जिंकली होती. मात्र २०२४ मध्ये शिवतारेंनी जगताप यांचा पराभव करत २०१९ मधील पराजयाचा बदला घेतला. जगताप २४ हजार मतांनी पराभूत झाले. त्यांनी १ लाखांहून अधिक मतं घेतली. आता जगताप भाजपमध्ये जाणार असल्यानं मतदारसंघात भाजपची ताकद वाढली आहे. तर शिवतारेंची अडचण वाढली आहे. उपमुख्यमंत्री अजित पवारांना थेट अंगावर घेणारे नेते अशी शिवतारेंची ओळख आहे.

मित्रपक्षांच्या विरोधात निवडणूक लढवून पराभूत झालेल्या महाविकास आघाडीतील नेत्यांचे पक्षप्रवेश भाजपकडून करुन घेतले जात आहेत. २०२९ मध्ये स्वबळावर लढण्याच्या दृष्टीनं भाजपनं तयारी सुरु केली आहे. त्याचाच भाग म्हणून मित्रपक्षांच्या विरोधात तुल्यबळ नेत्यांचा शोध आणि त्यांचे पक्षप्रवेश सुरु आहेत. सेनेचे मंत्री आणि पाटणचे आमदार शंभूराज देसाईंच्या विरोधात लढलेले सत्यजीत पाटणकर, अजित पवारांच्या राष्ट्रवादीच्या उमेदवारकडून भोरमध्ये पराभूत झालेले संग्राम थोपटे यांच्यासारख्या नेत्यांना भाजपनं पक्षात घेतलं आहे. त्यामुळे मित्रपक्ष धास्तावले आहेत.