शिवसेना उद्धव बाळासाहेब ठाकरे पक्षाचे आमदार अनिल परब यांनी आमदार संजय गायकवाड यांनी कॅन्टिन कर्मचाऱ्याला केलेल्या मारहाणीचा मुद्दा विधानपरिषदेत उपस्थित केला. तुम्हाला मुख्यमंत्री म्हणून अशा आमदारांचा पाठिंबा हवा आहे का, असा सवाल देवेंद्र फडणवीस यांना विचारला. यावर उत्तर देताना देवेंद्र फडणवीस यांनी आमदार गायकवाड यांना फटकारलं आहे. “मी या प्रकरणाची माहिती घेतली आहे. तसंच मारहाणीचा व्हिडिओही पाहिला आहे. अशा प्रकारचे कृत्य आपल्या कोणासाठीही भूषणावह नाही. यामुळे आपली प्रतिष्ठा, प्रतिमा कमी होत असते,” असं मुख्यमंत्र्यांनी म्हटलं आहे.

वर्ष सरली सतरा, शिवसेनेला पुन्हा खतरा; राज ठाकरे रिटर्न्स, फडणवीसांचा ‘काँग्रेस’ पॅटर्न

पुढे बोलताना मुख्यमंत्री फडणवीस म्हणाले की, “समोरून असं सांगण्यात आलं की, आमदार निवासातील सोई नीट नव्हत्या, भाजीला वास येत होता. पण या सगळ्याची तक्रार करता येते, त्यावर कारवाई करता आली असती, पण तो एक वेगळा मुद्दा आहे. सभापती महोदय, आपण स्वत: लक्ष घालावं, आमदार निवासात काही अनियमितता असेल, काही चुकीच्या गोष्टी वापरल्या जात असतील तर त्यावर कारवाई झाली पाहिजे. मात्र लोकप्रतिनिधीने मारहाण करणं, त्याचे व्हिडिओ येणं हे यातून सगळ्या आमदारांबद्दल लोकांमध्ये चुकीची भावना निर्माण होते. आपण सत्तेचा गैरवापर करतो, आपलं वर्तन नीट नाही, अशी भावना लोकांमध्ये जाते. विधानपरिषदेचे सभापती आणि विधानसभेचे अध्यक्ष यांनी या घटनेची दखल घेऊन जी कार्यवाही करणे गरजेचे आहे ती करावी,” असं मत फडणवीस यांनी मांडलं आहे.

नेमकं काय घडलं?

आमदार संजय गायकवाड यांच्यामुळे आमदार निवासात गोंधळ उडाला. त्यांना कॅन्टीनमध्ये जेवताना निकृष्ट दर्जाची डाळ मिळाली. त्यामुळे ते संतापले आणि त्यांनी कॅन्टीन व्यवस्थापकाला मारहाण करायला सुरुवात केली. ‘जर आमदारांना अशी डाळ मिळत असेल, तर सामान्य माणसांना काय मिळत असेल,’ असा सवाल त्यांनी विचारला. संजय गायकवाड यांनी व्यवस्थापकाला बोलावले आणि त्याला डाळीचा वास घ्यायला लावला. व्यवस्थापकाने डाळ खराब असल्याचे मान्य केले. त्यामुळे गायकवाड अधिकच भडकले. त्यांनी कर्मचाऱ्याला मारहाण करण्यास सुरुवात केली. लोकांनी त्यांना थांबवण्याचा प्रयत्न केला, पण ते थांबले नाही. हा व्हिडीओ सोशल मीडियावर व्हायरल झाला आहे.