सांगली, कोल्हापूर जिल्ह्यातील कृष्णा, पंचगंगा, वारणा नदीकाठच्या गावांसह अन्य गावांना आलमट्टी धरणाच्या ५१९ मीटर उंचीमुळे महापुराचा फटका बसला असताना कर्नाटक शासनाने आलमट्टी धरणाची उंची ५२४ मीटर करण्याचा घाट घातला आहे. या धरणाची उंची वाढवल्यास कोल्हापूर तसेच कराडपर्यंत संपूर्ण गावे पूरग्रस्त बनणार आहेत. यामुळे अलमट्टीची उंची वाढवण्याचा कर्नाटकचा प्रयत्न हाणून पाडण्यासाठी व महाराष्ट्र शासनाला जागे करण्यासाठी अंकली पुलाजवळ आज सर्वपक्षीय नेत्यांकडून चक्काजाम आंदोलन करण्यात आलं. या आंदोलनात भाजप,काँग्रेस, शिवसेना, स्वाभिमानी शेतकरी संघटना, इरिगेशन फेडरेशन यांच्यासह इतर पक्षही सहभागी झाले होते. आमदार सतेज पाटील यांच्या नेतृत्वात झालेल्या या चक्काजाम आंदोलनात कर्नाटक सरकार, राज्य सरकार आणि केंद्र सरकारवर तीव्र नाराजी दर्शवत जोरदार टीका करण्यात आली. आलमट्टीची उंचीवाढीचा निर्णय जोपर्यंत रद्द होत नाही, तोपर्यंत सर्वपक्षीय आंदोलन सुरूच ठेवणार असल्याचा एल्गार यावेळी करण्यात आला.

तब्बल 3 तास चाललेल्या आंदोलनादरम्यान दोन्ही बाजूची वाहतूक आंदोलकांनी अडकल्याने वाहतूक कोंडी निर्माण झाली होती. तर दुसऱ्या बाजूला सर्वाधिक महापुराचा फटका बसणारा शिरोळ तालुक्यात कडकडीत बंद ठेवून या चक्काजाम आंदोलनाला पाठिंबा देण्यात आला आहे.

“कर्नाटक सरकारने अलमट्टी धरणाबाबतची भूमिका घेतली आहे. त्याविरोधात आम्ही सर्वजण एकत्र आलो आहोत. राज्य शासनाने घोषणा न करता निर्णायक भूमिका घ्यावी, अशी आमची अपेक्षा आहे. राज्य शासनाने 21 तारखेला बैठक बोलावलेली आहे. या बैठकीत आम्ही आमची भूमिका मांडणार आहोत. राज्य सरकारने केंद्राकडे भूमिका मांडावी, जेणेकरून आम्हाला पुराचा धोका उद्भवणार नाही. जर असं झालं नाही तर अलमट्टी इथं जाऊन आंदोलन करण्याची तयारी केलेली आम्ही केलेली आहे. या संदर्भात निर्णय घ्यावा. अलमट्टीच्या उंचीवाढीला जी आता स्थगिती आहे ती केवळ तेलंगणा आणि आंध्र प्रदेश राज्याने घेतलेल्या विरोधी भूमिकेमुळे आहे. यामध्ये महाराष्ट्र शासनाने आपली भूमिका जाहीर केली नाही. त्यामुळे सरकार किती खरं बोलतं आणि किती खोटं बोलतं हे या बैठकीतून समोर येईलच,” अशी भूमिका काँग्रेस आमदार सतेज पाटील यांनी मांडली आहे.