भिवंडीतील अवचितपाडा येथे काही जण बनावट नोटा घेऊन येणार असल्याची माहिती भिवंडी युनिटचे वरिष्ठ पोलिस निरीक्षक जनार्दन सोनावणे यांना मिळाली होती. या माहितीनंतर सहाय्यक पोलीस निरीक्षक धनराज केदार यांच्या पथकाने सापळा लावून ३ मेला सुरज शेंडे, भरत सासे, स्वप्नील पाटील यांना ताब्यात घेत त्यांच्याकडून पाचशे रुपयांच्या तीस लाखांच्या बनावट नोटा जप्त केल्या. नोटांची एकूण ६० बंडल होती. तर, प्रत्येक बंडलमध्ये शंभर नोटा होत्या. शांतीनगर पोलीस ठाण्यात गुन्हा दाखल झाल्यानंतर पोलिसांनी या तिघांनाही अटक केली. त्यांच्या चौकशीमध्ये आणखीन काही आरोपींची नावे समोर आल्यानंतर सोमवारी रामदास दळवी, विजय कर्णेकर उर्फ विकी आणि शेखर बत्तीन यांना अटक केल्याचे पोलीस आयुक्त अमरसिंह जाधव यांनी सांगितले आहे.

या गुन्ह्यातील मुख्य आरोपी दळवी याचे भिवंडीतील सावद नाका याठिकाणी ट्रान्सपोर्टचे कार्यालय आहे. याच कार्यालयात बनावट नोटा छापण्यात येत असल्याची बाब चौकशीमध्ये समोर आली आहे. या कार्यालयातून बनावट नोटा छापण्याचे साहित्य जप्त करण्यात आले आहे. या साहित्यामध्ये लॅपटॉप, प्रिंटर, कटर, बॉन्ड पेपरचा समावेश आहे. तसेच, १५ लाख ५० हजारांच्या पाचशे रुपयांच्या बनावट नोटा जप्त करण्यात आलेल्या आहेत. अशाप्रकारे या कारवाईमध्ये एकूण सहा आरोपींना गुन्हे शाखेने अटक करत ४५ लाख ५० हजारांच्या बनावट नोटा जप्त केल्या आहेत.

बॉण्ड पेपरचा वापर

बनावट नोटा छापण्यासाठी बॉण्ड पेपरचा वापर केला जात असल्याची बाब पोलिसांच्या चौकशीमध्ये उघड झाली आहे. आरोपी आणखी कोणे बनावट नोटांची छपाई करत होते का? याची चौकशी गुन्हे शाखा करीत आहे. आरोपींनी पहिल्यांदाच बनावट नोटा छापल्या असून आरोपी शेखर याला प्रिटींग संदर्भात माहिती असल्याचे पोलिस उपायुक्तांनी सांगितले.

यापूर्वीही बनावट नोटा जप्त

ठाणे पोलिसांनी यापूर्वी अनेकदा कारवाई करत मोठ्या प्रमाणावर बनावट नोटा जप्त केल्या आहेत. २०२२ मध्ये गुन्हे शाखेच्या वागळे युनिटने दोन हजार रुपयांच्या आठ कोटींच्या बनावट नोटा जप्त केल्या होत्या. त्यामुळे बनावट नोटा छापणारे आणि वितरण करणाऱ्यांविरुद्ध कडक कारवाई करण्याची मागणी जोर धरु लागली आहे.