आजपासून मुख्यमंत्री देवेंद्र फडणवीस देखील आजपासून तीन दिवसीय दिल्ली दौऱ्यावर आहेत. यातच मंत्री धनंजय मुंडेंनीही दिल्लीत हजेरी लावली. ते देखील दोन दिवस दिल्ली दौऱ्यावर आहेत. यामुळे त्यांच्या राजीनाम्याच्या चर्चांना बळ मिळालं आहे. खासदार संजय राऊतांनी ‘मंत्रिपद वाचवण्यासाठी दिल्लीत जावे लागत असल्याचे म्हणत धनंजय मुंडेंवर निशाणा साधला होता.

राजीनाम्याच्या या मुद्द्यावर भाष्य करताना धनंजय मुंडे म्हणाले, ५१ दिवसात मी एकच गोष्ट बोलतोय की, सरपंच देशमुख यांची हत्या झाली. यात जे दोषी असतील त्यांना फाशी झालीच पाहिजे, त्यांना मोठ्यातील मोठी शिक्षा द्या हीच आपली भूमिका आहे. मुख्य आरोपी कृष्णा आंधळे याच्याबाबतही मुंडेंना प्रश्न विचारला असता ते म्हणाले, कोण किती दिवस फरार आहे, तुम्ही माझ्यावर ट्रायल करत असाल तर मी त्या गोष्टीवर बोलू नये.

तर धनंजय मुंडे पुढे म्हणाले, या सर्व प्रकरणात मुख्यमंत्र्यांना उपमुख्यमंत्र्यांना कुठे दोषी वाटत असेल तर राजीनामा मागावा. मी राजीनामा देईल. आता फक्त विषय काढला जात आहे. मी दोषी आहे की नाही हे मुख्यमंत्री आणि उपमुख्यमंत्रीच सांगतील. तर ‘५१ दिवस ज्या पद्धतीने प्रकरणात ट्रायल सुरू आहे. टार्गेट मीच आहे. असेही खोचक प्रतिक्रिया देखील त्यांनी दिली.

धनंजय मुंडेंनी असेही नमूद केले की, मुख्यमंत्री दिल्लीत येणार हे मला दिल्लीला येताना माहीत नव्हतं. मी दिल्लीला निघताना मला कळालं की, देवेंद्र फडणवीस देखील दिल्लीत येत आहेत. मी पहिल्यांदाच अन्न नागरी पूरवठा मंत्री म्हणून जबाबदारी घेतली आहे. त्यानंतर पहिल्यांदाच केंद्रीय मंत्र्यांची भेट झाली. लोकसंख्या सध्या वाढली आहे. यासोबतच आणखी ८ ते ९ महत्वाचे विषय आहेत, ज्यावर चर्चा करून मार्ग काढणे आवश्यक होते. त्यासाठीच मी दिल्लीत आलो. याआधीसुद्धा विभाग पाठपुरावा करत होता. महाराष्ट्राच्या सर्व समस्या सुटल्या पाहिजेत. केंद्रीय मंत्र्यांनी चांगला प्रतिसाद दिला, अशी माहितीही धनंजय मुंडेंनी दिली आहे.

माझ्या लोकांबद्दल माझी नैतिकता प्रामाणिक आहे. जी गोष्ट घडलीय, त्याबाबत मी जे बोललो ते प्रामाणिक बोललो. मी नैतिकतेत दोषी आहे, असं मला वाटत नाही. माझा दोष माझ्या वरिष्ठांना सांगावा लागेल, असेही ते म्हणाले.