कोपरगाव (अहमदनगर) : महाराष्ट्राचे आराध्य दैवत छत्रपती शिवाजी महाराज यांची जयंती सर्वत्र उत्साहात साजरी होत असताना कोपरगावात मात्र एक धक्कादायक घटना घडली आहे. पतीने पत्नीच्या डोक्यात हातोडा घालून हत्या केल्याची धक्कादायक घटना सोमवारी दुपारी अडीच वाजेच्या सुमारास कोपरगाव तालुक्यातील जेऊर पाटोदा शिवारात घडली आहे. सदर घटनेने एकच खळबळ उडाली आहे. पूजाने आजच शिवजयंती निमित्त छत्रपती शिवाजी महाराजांची मूर्ती हातात घेऊन फोटो काढला आणि तोच फोटो पूजाचा शेवटचा फोटो ठरला. पूजा अरुण दाभाडे (वय २६) असे मयत महिलेचे नाव आहे. याप्रकरणी कोपरगाव शहर पोलीस ठाण्यात भारतीय सैन्य दलात असलेल्या आरोपी पतीविरुद्ध खुनाचा गुन्हा दाखल करण्यात आला आहे.
याबाबत अधिक माहिती अशी की, पूजा अरुण दाभाडे हीचे माहेर कोपरगाव तालुक्यातील जेऊर पाटोदा असून सासर शहरातील टिळेकर वस्ती येथील आहे. पूजाचा पती आरोपी अरुण रतन दाभाडे हा भारतीय सैन्य दलात मणिपूर येथे कार्यरत होता. मात्र त्याची बदली चंदीगड येथे झाल्याने त्याला काही दिवस सुट्टी मिळाली होती आणि त्या निमित्ताने तो कोपरगावला आला होता. पूजा सध्या आपल्या दोन मुलांसह माहेरी जेऊर पाटोद्याला राहत होती आणि शहरातील आचारी हॉस्पिटल येथे गेल्या दोन महिन्यांपासून कामाला होती. आज शिवजयंतीच्या निमित्ताने पूजाने छत्रपती शिवाजी महाराजांची मूर्ती हातात घेतली आणि आपल्या सहकाऱ्यांना फोटो काढायला सांगितला. तोच फोटो पूजाचा शेवटचा फोटो ठरला. अरुणने यापूर्वी देखील पूजावर कोयत्याने वार केले होते. त्यावेळेस देखील तिला ३२ टाके पडले होते. मात्र अरुणने आज रागाच्या भरात पूजाला गाठून तिचा काटा काढला. आज अरुणची आठ वर्षाची मुलगी आणि पाच वर्षाचा मुलगा मात्र अनाथ झाले आहे.
दरम्यान पूजा सोमवारी दुपारी आपल्या घरी जात असताना आरोपी अरुण दाभाडे याने तिला रस्त्यातच गाठलं आणि डोक्यात हातोड्याने घाव घालत तिला जीवे मारले. दरम्यान घटनेची माहिती मिळताच कोपरगाव शहर पोलीस स्टेशनचे प्रभारी अधिकारी संदीप कोळी, सहाय्यक पोलीस निरीक्षक विश्वास पावरा, पोलीस उपनिरीक्षक रोहिदास ठोंबरे, भरत दाते आणि पोलीस कर्मचारी घटनास्थळी पोहोचले तसेच नागरिकांच्या साहाय्याने सदर आरोपीला ताब्यात घेतले आहे.
दोघांत पार्किंगचा वाद; रात्री अचानक १२ ते १३ जण आले अन् घडलं धक्कादायक कृत्य, पुण्यात खळबळ
पूजाचे मृतदेह शवविच्छेदनासाठी अमित खोकले यांचे रुग्णवाहिकेतून ग्रामीण रुग्णालयात पाठवले. दरम्यान आरोपीविरुद्ध पूजाचे वडील किरण तुळशीराम पठारे (वय ६२) यांच्या फिर्यादीवरून कोपरगाव शहर पोलीस ठाण्यात गुरनं ७४/२४ भारतीय दंड विधान कलम ३०२ प्रमाणे खुनाचा गुन्हा दाखल करण्यात आला आहे. घटनेचा पुढील तपास पोलीस उपअधीक्षक शिरीष वमने प्रभारी पोलीस निरीक्षक संदीप कोळी यांच्या मार्गदर्शनाखाली सहाय्यक पोलीस निरीक्षक विश्वास पावरा करीत आहे.