या सगळ्या प्रकरणावर मिराबाई कांबळे यांनीही भाष्य केलं. भाजपचे महापौर पदाचे उमेदवार चांगलं काम करणारे वाटले, म्हणून त्यांना मतदान केल्याचं मिराबाई कांबळे म्हणाल्या. पक्षानं सूचना दिल्या होत्या. पण भाजपचे उमेदवार विकासकामं करणारे वाटले, म्हणून त्यांना मतदान केल्याचा खुलासा कांबळे यांनी केला. पक्षाकडून कारवाई झाली तरीही भरपूर मार्ग असतात, असंही कांबळे पुढे म्हणाल्या.

अमरावतीत कोणत्याही पक्षाला स्पष्ट बहुमत मिळालेलं नाही. महापालिकेत एकूण ८७ जागा आहेत. पैकी सर्वाधिक २५ जागा भाजपला मिळाल्या आहेत. त्याखालोखाल १५ जागा काँग्रेसनं जिंकल्या आहेत. युवा स्वाभिमान पक्षानंदेखील १५ जागांवर यश मिळवलं आहे. युवा स्वाभिमान हा भाजपचा मित्रपक्ष आहे. त्या दोघांचा एकत्रित आकडा ४० वर जातो. एमआयएमनं १२ आणि अजित पवार यांच्या राष्ट्रवादी काँग्रेसनं ११ जागांवर विजय मिळवला. शिंदेसेनेनं ३, तर ठाकरेसेनेनं २ जागांवर बाजी मारली. अमरावती महापालिकेत बहुमताचा आकडा ४४ इतका आहे.