मराठा समाजाला ओबीसीतून आरक्षण देण्याच्या मागणीसाठी मनोज जरांगे पाटील यांनी मुंबई येथे उपोषण केले होते. हजारोंच्या संख्येने मराठा बांधव मुंबईत धडकले होते. आंदोलनाच्या पाचव्या दिवशी सरकारने हैदराबाद गॅजेटसह अनेक मागण्या मान्य केल्या. हैदराबाद गॅजेट लागू केल्यानंतर राज्यात ओबीसी समाज आक्रमक झाला आहे. सरकारने जारी केलेल्या जीआरविरोधात अनेक जिल्ह्यात मोर्चे काढले जात आहेत. याच दरम्यान जीआरविरोधात दोघांनी उच्च न्यायालयात याचिका दाखल केली. यात नांदेडहून प्रा मनोहर धोंडे यांचा समावेश आहे. धोंडे यांनी दाखल केलेल्या याचिकेनंतर रिसनगावं येथील मराठा समाज आक्रमक झाला आहे. याचिकाकर्ता प्रा मनोहर धोंडे यांची लोहा तालुक्यातील रिसनगाव येथे स्व मीनलताई ठाकरे निवासी आश्रम शाळा आहे. या शाळेत मराठा समाजासह सर्वच समाजातील विद्यार्थी शिक्षण घेत आहेत. धोंडे यांनी मराठा आरक्षणाविरोधात याचिका दाखल केल्याने मराठा समाजातील 21 जणांनी मुलांच्या टीसीसाठी सामूहिक अर्ज केला आहे. या प्रकारानंतर गावात मराठा विरुद्ध ओबीसी असा संघर्ष निर्माण झाला आहे.

Prakash Mahajan : मी असलो-नसलो तरी पक्षावर परिणाम नाही; प्रकाश महाजनांची मनसेला सोडचिठ्ठी, एकच वाईट वाटतं की अमित ठाकरेंना…

पहिली याचिका दाखल करणारे मनोहर धोंडे नेमके कोण?

मनोहर धोंडे हे पेशाने प्राध्यापक होते. ते छत्रपती संभाजीनगरमधील देवगिरी कॉलेमध्ये प्राध्यापक म्हणून कार्यरत होते. 1988 पासून राजकारणात सक्रिय आहेत. शिवसेना पक्षातही काम केले असून मराठवाडा विभाग पदावर काम केले. 1996 साली शिवा अखिल भारतीय वीरशैव युवक संघटनेची स्थापना केली. यानंतर 2002 मध्ये शिवसेनेच्या तिकिटावर त्यांनी पदवीधर मतदारसंघाची निवडणूक लढवली. त्यानंतर 2009 मध्ये त्यांनी लोहा कंधार मतदारसंघातून विधानसभा निवडणूक लढवली होती. लिंगायत समाजाला ओबीसीमधून आरक्षण मिळावं यासाठी त्यांनी काम केलं. त्यानंतर 2024 मध्ये त्यांनी सेवा जनशक्ती पक्षाची स्थापना केली. त्याच पक्षाच्या तिकीटावर त्यांनी पुन्हा एकदा विधानसभा निवडणूक लढवली होती, त्यात त्यांचा पराभव झाला होता.

टीसी काढून घेण्याच्या मराठा पालकांच्या निर्णयामुळे गावात पडसाद

नांदेड जिल्ह्यातील लोहा तालुक्यातील रिसनगाव येथील निवासी आश्रम शाळेतून पाल्याचे दाखले काढण्यासाठी मराठा पालकांनी सामूहिक अर्ज केला. या निर्णयाचे पडसाद गावात उमटले असून या गावात आता मराठा विरुद्ध ओबीसी असा वाद निर्माण झाला आहे. मराठा समाजाच्या निर्णयानंतर गावातील ओबीसी समाजाने बैठक घेतली असून मराठा संस्था चालकाच्या शाळेतून ओबीसी विद्यार्थी काढून घेण्याचा निर्णय या बैठकीत घेण्यात आला. रिसनगावात जय महाराष्ट्र निवासी शाळा आहे. या मराठा संस्थाचालकाच्या शाळेतून ओबीसी विद्यार्थी काढून घेण्याचा निर्णय ओबीसी समाजाकडून घेतला आहे.