14 जुलै 205 रोजी राजस्थानच्या बॉसवाडा जिल्ह्यातील लोहारीया पोलीस स्टेशनमध्ये एक अल्पवयीन मुलगी फूस लावून पळवून नेल्याचा आणि तिच्यावर अत्याचार केल्याचा गुन्हा दाखल करण्यात आला होता. याप्रकरणी लाला रामु बमनिया (वय 22, रा. बॉसवाडा, राजस्थान) आणि सुरेश लक्ष्मण खराडी (वय 19, रा. सदर) या दोघांविरुद्ध भा. न्या. सं. कलम 137 (2), 65 (1), तसेच POCSO कायद्यान्वये कलम 3, 4 आणि JJ कायद्यान्वये कलम 84 अंतर्गत गु. र. नं. 87/2025 नोंदवण्यात आला होता.

गुन्हा केल्यानंतर हे दोन्ही आरोपी फरार झाले होते. 15 जुलै रोजी आरोपी पुण्यातील चंदननगर भागात एका चहाच्या टपरीवर काम करत असल्याची माहिती राजस्थान पोलिसांना मिळाली होती. ही माहिती पुणे पोलिसांना मिळाल्यानंतर, चंदननगर पोलीस स्टेशनच्या वरिष्ठ पोलीस निरीक्षक श्रीमती सीमा ढाकणे, तसेच अपर विशेष गुन्हे शाखा 2 चे पोलीस निरीक्षक सुदर्शन गायकवाड आणि त्यांच्या पथकाने तातडीने तपास सुरू केला.

त्यानंतर चंदननगर बाजार परिसरात शोध घेत असताना आरोपींना पोलिसांच्या हालचालीची कल्पना आली आणि त्यांनी पळ काढण्याचा प्रयत्न केला. मात्र, पोलिसांनी तत्परता आणि गोपनीय माहितीच्या आधारे त्यांचा पाठलाग करून आरोपींना तुकारामनगर, खराडी येथून ताब्यात घेतले.

अटक करण्यात आलेले आरोपी लाला रामु बमनिया आणि सुरेश लक्ष्मण खराडी सध्या पुणे पोलिसांच्या ताब्यात असून दोन्ही आरोपींना राजस्थानच्या लोहारीया पोलीस स्टेशनच्या ताब्यात सुपूर्द करण्यात येणार आहे, अशी माहिती आहे.