या प्रकाराबाबत तब्बल आठ दिवस उलटूनही रामानंद पोलीस तसेच पोलिस अधीक्षक कार्यालयातील अधिकारी तक्रार घेत नसल्याने त्रासाला कंटाळून मुलीच्या वडिलांनी गळफास घेतल्याचा धक्कादायक आरोप मयताचे भाऊ तसेच मुलाने केला आहे. या प्रकरणात गुन्हा दाखल करून आरोपींना जोपर्यंत अटक होत नाही तोपर्यंत मृतदेह ताब्यात घेणार नाही, असा पावित्रा कुटुंबियांनी घेतला आहे.

मुलगी 5 महिन्यांची गर्भवती, नंतर गर्भपात

अल्पवयीन मुलींना रोजगाराच्या निमित्ताने घेऊन जाऊन त्यांना विकून देणे, त्यांचे परस्पर लग्न लावले, या सर्व गोष्टींचे मोठे रॅकेट असून याचा सीबीआयच्या माध्यमातून तपास करण्याची मागणी सुद्धा नातेवाईकांनी केली आहे. अल्पवयीन मुलीला रोजगाराच्या बहाण्याने मुलीला नाशिक येथे घेऊन जळगावातील काही महिलांनी तिला कोल्हापूरच्या लोकांना अडीच लाख रोख तसेच दागिने घेऊन विकून दिल्याचा आरोप नातेवाईकांनी केला आहे. जबरदस्तीने लग्न लावून दिल्यानंतर या काळात अल्पवयीन मुलगी पाच महिन्याची गर्भवती सुद्धा झाली, तिचा गर्भपात सुद्धा झाल्याची माहिती कुटुंबियांच्या वतीने देण्यात आली आहे.

पीडितेच्या कुटुंबियांचा पोलिसांवरही आरोप

या प्रकाराला कंटाळून अल्पवयीन मुलगी घरी पळून आली, तिने तिच्यासोबत घडलेली आपबिती कथन केली, हे ऐकून कुटुंबियांना मोठा धक्का बसला. या प्रकरणाबाबत अल्पवयीन मुलीच्या कुटुंबीयांनी तब्बल आठ दिवसांपासून तक्रार देऊनही रामानंदनगर पोलीस ठाण्यात तसेच पोलीस अधीक्षक कार्यालयातील अधिकाऱ्यांनी गुन्हा दाखल केला नसल्याचा आरोप केला आहे.

मुलीला विकत घेणारे तसेच तिच्या सोबत लग्न करणारे कोल्हापूर येथील कुटुंब मुलीला परत पाठवा तसेच आमचे पैसे सुद्धा द्या अशाप्रकारे त्रास देत धमकी देत असल्याचा आरोप करण्यात येतोय. तर दुसरीकडे याबाबत पोलीसही तक्रार घेत नसल्याने या सर्व गोष्टींना कंटाळूनच मुलीच्या वडिलांनी आत्महत्या केल्याचा आरोप कुटुंबीयांनी केला आहे.