नीलम गोऱ्हे या पुणे महानगरपालिकेच्या अधिकाऱ्यांना विधान परिषदेत ‘लक्षवेधी’ मांडण्याच्या धमक्या देऊन पैसे उकळत होत्या, असा गंभीर आरोप वसंत मोरे यांनी केला आहे. तर महापालिका अधिकाऱ्यांकडून पैसे उकळणाऱ्या तुम्ही उद्धव साहेबांना मर्सिडीज काय देणार? असा सवाल सुद्धा वसंत मोरे यांनी नीलम गोऱ्हे यांना विचारला आहे.

तर, २०१२ पासून ते २०१७ पर्यंत शिवसेना नेत्याने तोंड उघडले तर ताई तुम्ही कुठे असाल? असा थेट इशारा सुद्धा वसंत मोरे यांनी दिला आहे. त्यामुळे नीलम गोरे यांच्या वक्तव्याने पेटलेला हा वाद आणखीनच चिघळण्याची शक्यता आहे.

दरम्यान, शिवसेनेचे (उद्धव बाळासाहेब ठाकरे ) खासदार संजय राऊत यांनी सुद्धा नीलम गोऱ्हे यांच्यावर गंभीर आरोप केले आहेत. पुणे महानगरपालिकेमध्ये अशोक हरणावळ म्हणून आमचे गटनेते होते, त्यांची मुलाखत घ्या मग हे मर्सडीज प्रकरण काय आहे त्यांना कळेल. नाशिकला माजी महापौर आणि स्थानिक गटनेते यांना तिकिट देण्यासाठी या बाईंनी किती पैसे घेतले होते, त्यांनाच जावून विचारा. मी रेकॉर्डवर सांगतोय ते प्रकरण काय झालं आम्हाला माहिती आहे. त्याने या बाईकडून पैसे कसे वसूल केले त्यांची मुलाखत घ्या मी आणखी नावे सांगेल. असं संजय राऊत म्हणाले आहेत.

तुम्ही कोणावर थुंकताय, बाळासाहेबांनी कर्तृत्त्वावर आमदार केलं? बाळासाहेब अशा घाणेरड्या लोकांना आमदार करत नाहीत. अशी विधाने मातोश्रीबाबतीत करता, ज्यांनी तुम्हाला चारवेळा आमदार केलं असं देखील राऊतांनी म्हटलं आहे.