नेमकं काय घडलं?

प्रत्यक्षदर्शींनी दिलेल्या माहितीनुसार, एक पांढऱ्या रंगाची क्रेटा कार प्रचंड वेगात चौकाकडे आली. समोरून येणाऱ्या दुचाकीला या कारने इतक्या जोरात धडक दिली की, दुचाकीस्वार हवेत अनेक फूट उंच उडून दूरवर फेकला गेला. ही धडक साधी नव्हती तर ती मृत्यूच बनून आली होती. कारची गती इतकी अनियंत्रित होती की, दुचाकीला उडवल्यानंतर क्रेटा कारने स्वतःवरचे नियंत्रण गमावले आणि ती रस्त्याच्या मधोमध एखाद्या खेळण्यासारखी उलटी झाली.

दृश्य पाहून काळीज कापलं!

अपघातानंतरचे दृश्य अतिशय भयावह होते. ज्या दुचाकीला धडक बसली, तिचा अक्षरशः चक्काचूर झाला. धडकेमुळे दुचाकीस्वार रस्त्याच्या कडेला असलेल्या पडिक जागेत जाऊन कोसळले. रक्ताच्या थारोळ्यात पडलेल्या त्या तरुणांना पाहून मदतीसाठी धावलेल्या लोकांच्याही पायाखालची जमीन सरकली. दुसरीकडे, रस्त्याच्या मधोमध पलटी झालेली कार आणि चारी बाजूंना विखुरलेले काचेचे तुकडे अपघाताची भीषणता सांगत होते.

ZP Election : याला म्हणतात जबाबदार नागरीक! नवरदेवाचं मतदान केल्यानंतरच वऱ्हाड निघालं लग्नाला

रुग्णालयात मृत्यूशी झुंज अपयशी

घटनेची माहिती मिळताच स्थानिक नागरिकांनी आणि पोलिसांनी तातडीने रुग्णवाहिकेला पाचारण केले. रक्ताच्या थारोळ्यात पडलेल्या जखमींना तातडीने सीपीआर रुग्णालयात हलवण्यात आले. डॉक्टरांनी शर्थीचे प्रयत्न केले, पण नियतीला काही वेगळेच मान्य होते. उपचारादरम्यान दोन्ही दुचाकीस्वारांची प्राणज्योत मालवली.

पोलिसांची धाव आणि वाहतूक कोंडी

अपघातामुळे शाहू मिल चौकात बघ्यांची मोठी गर्दी जमली होती, ज्यामुळे वाहतुकीचा खोळंबा झाला. पोलिसांनी तातडीने क्रेन बोलावून पलटी झालेली क्रेटा कार बाजूला केली आणि रस्ता मोकळा केला. हा अपघात तांत्रिक बिघाडामुळे झाला की चालकाच्या बेदरकारपणामुळे, याचा तपास आता पोलीस करत आहेत.